Jedan od najžešćeh svieci je siguro svieti Martin, ali Mrtin, kako mu se još reče. Uon pride potle seh svieci. Ne samo po kalendare, nego i po Litanijah. Jedanput so ljudi po kućah molili za se potrebi. Kade je ki zna štet, je moli i Litaniji seh svieci. Male dice niso bili svieci poznati. Pak kat je otac moli Litaniji, potle “sveti Luka”, je pita jedan otročić: “A zač ne molimo i sveti Česan?” A drugi put je pita, aš se svetega Martina zaziva skoro na kraje Litanij: “Ćaćo, a kade je bi do sada sveti Martin?”. Otac mu je zajno zatuka tresko da se ne bi usudi rugat sviecuon.
Puol kapota odreza i da siromahu
Za svetega Martina se je vajk poviedalo kako je uon bi uficir. I kako je jeno jutro jaha na konje i sreti po mraze siromaha već golega nego ubučenega ki je sa drhtie va jutro puno mraza. I ča je svietac stori? Je zie sabljo, ča je ime za pason, odreza je puol kapota i da siromahu. Po noće ga je zbudila velika svetlavina. I va njie je vide Isusa ugrnjenega z unon polovicom kapota ča ga je tega jutra da siromahu. I vajk so nan stareji poviedali: “Ča se stori siromahu, se stori Bogu.”
Proti siromahu se je vajk imelo dobro srce. Vajk mu se je dalo jes, pit, puštilo ugrejat i dalo spat. Ni bilo straha da će te siromah kojenat, ali pokras, kako se dogodi danas kat se ki samo pričinja da je siromah. Ot takovega se trieba čuvat. Va Istrije so bili jeni frati. So se zvali benediktinci. Nan so blizu bili va Savičiente, z uno criekvo na cimitare, va Dveh gradah, va Kloštre zgora Lima, va Sveten Lovrieče na meste kade je cimitar, poli Ladići, na Brbanšćine. A benediktinci so imeli riegulo za čovika ki je potucka na njihova vrata: “Neka ti gost, buode kako Kris!” Sveti Martin je bi vajk na pomene. Je bi škuola cielo leto i za sakega.
Štima je roba za čovika
Rodi se je va Ungarije. Otac je služi ojsko kako rimski uficir. Uniput je meštier hodi z oca na sini. Zato je i Mrtin ša z ocien još kako otrok va ojsko i se je vadi za uficira. Je bi štret i je priša uficir kako i otac. Kat je Mrtin živie so bili robi. Uficir je imie pravo imet roba ki mu je služi i se dela za gospodara. Roba niso držali za čovika. Gospodar ga je moga tuć, prodat, mučit, ubit i nienemu ni odgovara. Neki uficiri prez duši so roba činili čupnut na četiri. Uficir bi z noguon sta na život roba da laglje zajaše na konja. A kat je priša doma, opet je rob muora stat na četireh s poli konja da gospodar laglje razjaše. Uno ča je bilo čudno, Mrtin ni sojen robe tako dela. Uon mu je patina škuornji, skupa so jeli za stoluon. Štima ga je za čovika. Kako je uon priša do tega kat so si drugi gospodari roba škorišćavali? Zasiguro je imie dobro srce kako i kat je siromahu da puol kapota.
Po zime so soldati, ku ni škopijala ojska, čekali prolić da pojo na fruont. Mrtinu se je paralo da gubi vrieme. Ali ga je još jena stvar mučila. Mu se je paralo da za njega nima smisla ojskovat. Pak je reka glavnemu uficiru da bi pušti urujže. A uni mu se ruga da ima strah ot smrti i želi uć. Mrtin je tie pokazat da ni strahljif i reka, ku rabi, da će prez urujža pasat skruos na skruos med soldati ki so in bili neprieteli. Ali ojski ni bilo. Pak je Mrtin urujže stai pret nogi uficira i je ša ća. Malo kada se je trefilo da na prolić ni bilo ojski, pak so soldati guorili da ni bilo ojski zato ča je unde bi Mrtin svietac.
Ša je met frati va jedan kloštar. I tamo je pensa i pensa: zač se čovik rodi? I mu je prišlo va glavo da život vriet pasa, pride smrt i te ni.
Kraljica mu je nogi bušala
Zato je odluči zustat s frati, bit siromah, živet čisto, delat dobro delo i spasit dušo. Tamo je sreti nekega svetega Hilarija ot kiega se je čuda navadi. Tamo je Mrtin bi uživie jenega mrtvega. Znajeć za Mrtina da dela mirakuli, prišli so po njega ljudi jako z dugega, z Franciji i so ga molili da je va grade Tourse jena žienska jako buolna. I uon, dobrega srca, je ša. Kat je priša va grat Tours, so mu povedali istino. Bolnik je bila biškupija ka je zustala pres biškupa. I tamo so ga preku volji staili za biškupa. Ma niso za nič.
Uon je puno dela za krstijani, za si ljudi, proti krivovierniki, zajno se je razglasilo da je svietac. Uniput so biškupi imeli so vlas, pak je narot pot svieten biškupon proživie. A kat je čuda njih prihajalo da ga vido i hvale, uon bi ša va neki kloštar. Tamo bi počinu, pak je opet torna na soje delo.
Jedanput je kako biškup priša va jeno siromašno plovanijo. Niso ga imeli kade stait spat, pak so mu pusteljo staili va sakreštijo. Bila je zima. Naložili so uganj. Po noće se sakrestija važgala. Niedan ni moga pomoć. Svietac je kleka, se je pomoli, i uganj se je zagasi. Je uživie i jenega utroka. A kat je pohodi kralja, kraljica mu je nogi bušala, služila ga i pojela mrvice z stola ča so mu ustale. Kade got je priša, narod je bi prekuntenat.
Kat so njegovi plovani čuli da je bolan, so bili prežalosni. A Mrtin je pret njima reka: “Dragi Bouh, ku san još potrieban tojemu narodu, ću ziet ta križ na se, ku ne, raji ću umriet i poć h Tebe va nebo”. Sveti Mrtin je umra kat je imie osandesiet i jeno leto, leta tristuo devedesiet i devietega.
Na tiele so mu našli cilicij
Kat je umra, si so bili znenajeni aš so mu na tiele našli cilicij. Cilicij je bi široki pas ud usonja va kiega si bili zatučeni čavlići. I uni so ga boli dan nuoć. Neki svieci so tako sami sebe mučili i delali pokoro za uni ča se igrajo sojon dušuoni rišćajo finit va pakle.
Kat je Mrtin umra, je to bilo dato kapit jenen drugen svieten biškupu, sveten Ambrozije va Milane. Sveti Ambrozije je maši. Za vrireme maši je zamra. Tri uri je bi kako dreven. Ljudi so se čudili, žač maša ne gre napret. A kat je priša va se, je ljuden reka: “San bi na pokopanje svetega Mrtina va Tourse va Francije.” Zač je sveti Ambrozije ša na njegovo pokopanje? Foši zato ča je sveti Mrtin bi uficir va Milane i spasi ki zna koliki ljudi ot smrti aš se ni ojskovalo dokle je bi tamo. Kako je sveti Ambrozije va tri uri ša z Milana va Tours, bi na pokopanje i priša nazat, nikat niećemo znat? Ali svieci se moro, guore stari ljudi.
Potle se je raširila kršćanska vera po sviete, sveti Mrtin je bi zaštitnik soldati. Soldat ne smie kras, ubijat, maltratat dico, starci, buolni i ranjeni. Poštien soldat ima samo branit soj narot, ne nepadat drugi.
Svetega Mrtina časte i rado ga imajo: zemljodielci, soldati, uficiri, siromahi, goli i bosi, lačni, biškupi i plovani, frati. I ki ča se ne? Dišenjievajo ga ali storijo kip kako jaše na konje i soj kapot rieže ledenen petljare.
Po plovanijah četrnajs crekaf
Veruvali ali ne, va Istrije je osan plovanijah zabrlo svetega Mrtina za sojiega patruona. To so: Beram, Dolenja Vas, Ližnjan, Sveti Lovrieč Pazenatički, Sveti Martin poli Labina, Momnjan, Vrsar i Tar. I još je us to po plovanijah četrnajs crekaf svetega Martina. I bi reć da je najstareja una crekvica spot Odnjana va sele Golubovo ka je pret par liet stavljena pot krouf. Je bila pres krova i nanke je drugo niso nigdere ni spominjali va librah. So jo držali zgubljenon zavajk. Bi reć da je ta criekva uzidana prvo leta miljar. I bila je samo preku puota starega grada Mednjana s kega so zadnji ljudi šli miljar i dvijetuo i dvajest i šiestega leta, kat već ni bilo nikakove šperanci da se unde ljudi moro branit ot seh ki so hi napadali. I so šli živet h drugen ljuden na meste kada je danas Odnjano.
Neki študijani ljudi guore da je criekva svetega Martina bila sagdere uzidana kade so bili soldati. A va Istrije so bile, ča mi danas znamo, se skupa dvajset i dvie criekvi. Po Istrije je pasalo čuda ojski. To se vidi i po kaštelah ki so još ustali, kako va Pazine, va Savičiente, va Balah, Motovune, Labine, Plomine i drugdere da ne sve nabrajan. Vide se još i stara vrata va Labine, Rovinje, Buzete, Mutvorane i drugdere.
Pretakanje vina i gobice
Za svetega Mrtina se je zadnji put pretočilo vino. Kat se je gruojze speštalo, ali zgrandelalo, mlado vino se je utakalo jedanput, ali već puti. I čekalo se je da se ustoji. Ki so imeli bačaf so pretočili triputi, ki ni imie, je samo jedanput. I za svetega Mrtina vino je bilo stavljeno na čisto. Bačvi so se zadnile i pomalo se je točilo za prieteli, za fešti, za trdo delo. Za pit je bila bevenada. Potle utakanja, na drop se hitilo odi. Ot dropa je oda dobila koluor i neki guš. Neki so hodili trunit smrečko, i na njo nalili odo i je bilo gušno za pit. Si so guorili da je smrečka zdrava za bubregi.
Potle leta je zahladilo, dani so bili dajžievni, pres sunca, oblačni. Ali koli svetega Mrtina, se je užalo storit liepo vrieme. Je bilo teplo, pak so guorili da je to “leto svetega Martina”. Za Martinjo, aš je bilo teplo i mokro, se je našlo gobic. I so hi zvali martinšćice. Vajk se je poviedalo kako se je jena fameja bila utrovala z gobicami. I so hi zvali Gobičari. Ot straha da se ne utrujuo, rietki so brali gobice. Gobice se niso delale na si mogući načini kako i danas. Ulja ni bilo. Za litar ulja so ljudi va Odnjano nosili kilo pršuta. Gobico se je stailo na ugljievlje. I kat se je gobica jeno malo steplila, so na dolenji kraj stavili par zrn soli i pojeli za guš.
Piše: Marijo VITORJOF